الرئيس السيسي يوجه الحكومة بعدم تحميل المواطن أعباء إضافية خلال الفترة المقبلة لانى أعلم بضعف المرتبات.. أقل من 10 آلاف جنيه لأى حد مش هايعيش
كتب : وراء الاحداث
وجه الرئيس عبد الفتاح السيسي، بالبدء الفوري لوضع السياسات والتشريعات اللازمة لتنفيذ توصيات المؤتمر الاقتصادي ونصائح الخبراء الاقتصاديين لتكون خارطة طريق لمسار الاقتصاد المصري خلال السنوات المقبلة، مع توجيه الحكومة بإجراء تقييم شامل بشكل دوري للإجراءات المتخذة للتأكيد على فعاليتها.
وتابع الرئيس السيسي: “الواقع الموجود في العالم تأثيره سلبي جدا على كل الدنيا، والشعوب بتعاني، وإحنا في مصر حالتنا مش هتتحمل ضغط أكتر من كده، بل بالعكس هتحتاج مننا نزود مظلتنا للحماية الاجتماعية في المرحلة الموجودين فيها حتى نخف على المواطنين تداعيات الأزمة دي، بذلك أوجه الحكومة بتعزيز مظلة الحكومة لتخفيف تداعيات الأزمة الاقتصادية العالمية على المواطنين، وتوفير أقصى
قال الرئيس عبد الفتاح السيسي، إنه يجب كُره الفقر وعلى الجميع أن ينهض لتغييره، مضيفا: “لا يجب أن أكره سلوكيات الفقر، ولكنى أكره الفقر نفسه وأستهدف الفقر ونغيره مع بعض، وأنا هقولكم على حاجة بالنسبة للمدرس، مفيش شباب يساعد مع مديريات التعليم في المحافظات للتدخل بشكل لطيف مع المجموعة الموجودة يشجعهم.. ما المرتبات تعبانة، أيوة تعبانة”.
وتابع الرئيس: “والله العظيم أنا بكلمكم من قلبي، أقل من 10 آلاف جنيه لأى حد بيشتغل، مش هيعيش، ما أنت هتقولي إديهم، هقولك يا ريت، هتقولي ما أنت بتتكلم عن ميناء بـ40 مليارا، أنا لازم أكون متوازن في إدارة الأمر، غيرنا كان مساره أكل، وشرب، ودفع فلوس وسابها لما بقت على الحديدة، وقلتلكم الإصلاح الموجود أكبر من قرار أي رئيس في الوقت ده، وبالتالي الناس خرجت هدمت الدولة، لأنها مش مستحملة تاني، فلا بد أن أشتغل على كل قطاعات الدولة”.
أضاف الرئيس السيسي، في كلمته بالجلسة الختامية للمؤتمر الاقتصادي: “أنا مهتم بكله، ولما تيجي تتكلم مع وزير التعليم العالي وتقوله أضفت كام جامعة، يجي يقولك إيه، دول بيعملوا الجامعات الأهلية للأغنياء، لأ.. أنا بعمل مسار أطور به التعليم بتكلفة مالية أقل علشان أقدر أحسن في بيئة التعليم، والمسار المتوازي هو، عندي قبح وعندي حسن، أخلص القبح؟ ولا أعمل الحسن؟.. أنا رأيي أعمل الحسن وأزود فيه وأقلل في القبح، ده اللي أنا وأي إجراء بعمله في أي حاجة في البلد، هدفه أن أتخلص من القبح في كل شئ”.
وأردف: “بالنسبة لكل مستشفيات مصر، تعالى ياللي مهتم بالعمل في المجال ده اعمل معايا اتفاق، هديك المستشفى واقفة على رجلها زي الفل، ولو بصرف على المستشفى 50 مليون جنيه في السنة هدفعهم، بس تعالى ديرها بنظام انت بنظام استثماري مقابل نصيبي، ده متاح لكل المستشفيات في مصر، وأنت ديرها بكفاءة القطاع الخاص وحسنه، وأنا صاحب مصلحة، ولو وصلنا لتحسين الخدمة الطبية، الخدمة هتتحسن، وعرضنا الكلام ده من زمان”.
وفيما يتعلق بالزراعة، قال الرئيس السيسي: “لما جينا نعمل الزراعة بدأنا بمليون ونص مليون فدان، واتقالنا من المستثمرين هنعمل إحنا البنية الأساسية وهنزرع الأرض، طيب حجم اللي اتزرع كام من المطلوب، 10%، 20%، طيب هل اتعمل بنفس الجودة والكفاءة اللي بنتمناها لقطاع الزراعة في مصر؟، أنا برضو بقدم كشف حساب زيكم، النتيجة إيه المسار.. اللي اتزرع مايجيش 20% من الأرض دي!”
تحدث الرئيس عبد الفتاح السيسي عن المعاشات، قائلا: “حد يطلع يقول زودوا المعاشات شوية.. الدكتور محيي خدوا 400 مليار.. هدفعهم 40 تريليون جنيه حتى عام 2052”.
وأضاف الرئيس السيسي، خلال كلمته في الجلسة الختامية للمؤتمر الاقتصادي: “لما جت القضية اللى رفعها الله يرحمه البدري فرغلي.. وقال خدتوا فلوس الغلابة والمعاشات.. نحل المسألة دى إزاى؟ مش كده يا دكتور معيط.. 400 مليار، حد قال لو قعدوا زي ما هما في البنوك طول المدة دى كانوا جابوا كام؟ تفتكروا الرقم كان يكفى؟”.
تحدث الرئيس عبد الفتاح السيسي، عن التعاون لحل مشاكل الدولة المصرية، قائلا: “كتير من اللى قاعدين هنا.. وناس اقتصاديين.. في بداية 2014 التقيت بهم.. وقولت لهم تحبوا تيجوا تمسكوا الوزارة.. قالوا لا.. احنا لينا تاريخ.. مستخسر تاريخك في بلدك.. انا مش بلوم حد والله ما بلوم حد.. احنا نعرف يعني إيه الحال ده ننجح ولا لا.. خلينا بعيد”.
وأضاف الرئيس السيسي، خلال كلمته في الجلسة الختامية للمؤتمر الاقتصادي: ” حد تاني قالى هتديني كام.. انا باخد 2 مليون في الشهر.. قولت له مش هقدر.. قالي سبني بعيد وانا أي نصيحة هقولك عليها”.
وتابع الرئيس السيسي: “اللى بتكلم فيه في صلب المؤتمر الاقتصادي.. وصلب الحوار الوطني.. عاوزين نشوف بعض ونتكلم حتى لو فيه اختلاف.. طب انا حلت موضوع الموانئ والبينة الأساسية بحاجة تانية.. حد يقولي اطرح القطاع الخاص والأجانب يعملوا ده.. أنا معاك .. بس مفيش وقت اتأخر أكثر من كده.. ومفيش 10 و15 سنة إنى اطرح واستني.. إللى اعرف اعمله أنني أعمل انا.. طب بقت موجودة.. إللى عاوز يتفضل.. لكل الناس بما فيها شركات الجيش.. وشركات الدولة مطروحة ايوه.. ده فرصة للكل”.
